عاوزاك تموت علشان تعيش

--------------------------------------------------------------------------------

عاوزاك تموت علشان تعيش

مش مشكلة
إيه يعني هتهدِّ السلاسل
إيه يعني هتحلّ القيود
مش مشكلة
إمسك نواصي المسألة
روح حلّها
أحسن ما ييجي اليوم عليك وتْكون مثل مِ الأمثلة
روح فكّ خوفك سرّّبـُه
دوّر على الشهد اشربُه
وانْ كان ده مرّ الشقيانين الغلبانين
مش مشكلة
برضو اشربُه
اطعن في كلِّ الذكريات
اندم على كلِّ اللي فات
أصلِ اللي فات ده كان غلط!!!
مالك كده...بتبصلي!!
أيوة انـْت حلمك كان غلط
أيوة انْـت حبّك كان غلط
أيوة انـْت تفكيرك غلط
ليلك على نـْهارك غلط
صحّح في كل الأجوبة
خلّي الدموع متـْرتّبة
الدمعة دي
بعديها دي
علشان في دمعة تالتة جايّة مـْلهلبة
غيّر طريقك/سكّتك
نيّم ضميرك ريّحُه
تعبان أوي
تعبان ومن كتر اللي شافُه/قام سِكِت
قطّع في أحلامك حِتَت
اكنس عروقك من بواقي الطيبة فيها...
"...إنت حاسسْ/إنِّ ليها لازمة خالص؟!!..."
يلا نضّف/يلا ستّف...
واوْعى تنسى....
تقطف القلب اللي ميّت جوّه منَّك
والدنيا دايرة بْتضربُه
والضّرب في الميّت حرام
روح ادْفنُه
روح غنّي غنوة للحياة
أجمل حياة/من غير قلوب
من غير ما تكسرنا المشاعر
وانت شاعر بالعيوب
مالك كده...بتبصلّي!!!
مفهمتنيش؟!!!
ركّز بقى
عاوزاك تعيش
عاوزاك تموت/علشان تعيش